བདེ་ཡངས་སྐྱིད།ཕ་ཡུལ།རྔ་བ་ཁུལ་ཁྱུང་མཆུ་རྫོང་།ཞིང་ཆེན་བོད་ཡིག་སློབ་གྲྭ་ནས་མཐར་ཕྱིན་ཅིང༢༠༡༢ལོར་དཀར་མཛེས་ཁུལ་ཉག་ཆུ་རྫོང་ཁོག་ལ་ཡུལ་ཚོའི་ལྟེ་གནས་སློབ་ཆུང་ནས་དགེ་རྒན་གྱི་བྱ་བ་ལོ་ངོ་གསུམ་ཙམ་གཉེར།༢༠༡༥ལོ་ནས་ད་ལྟའི་བར་ཉག་ཆུ་རྫོང་འཕྲིན་སྦྱོར་མཉམ་འདྲེས་ལྟེ་གནས་སུ་ཡིག་བསྒྱུར་མདོ་འཛིན་སྒྲིག་སྦྱོར་སོགས་ཀྱི་བྱ་བ་གཉེར་བཞིན་ཡོད། 

朗诵:德杨洁

毕业于四川省藏文学校 

2012年雅江县柯拉中心小学教师

2015年雅江县融媒体中心翻译

ངས་གྲོང་ཁྱེར་དུ་ཡིད་འགུག་ལང་ཚོའི་བར་གྱི་ཧམ་པ་དེ་མཐོང་ལ

ཤ་སྐྱིའི་བར་དུ་ཡིབ་པའི་འཚུལ་ཆོས་ཀྱི་དྲི་མ་དེ་མྱོང་ཐུབ

ངས་སྒེག་ལྡན་བུ་མོའི་རལ་གྲི་ལྟ་བུའི་མིག་ཟུང་གི་གཏིང་ན་ཉར་བའི་གཡོ་སྒྱུ་དེ་མཐོང་བས

ཁ་ཕྱིར་འཁོར་དུས།

ས་མཐོའི་བུ་མོའི་མིག་འབྲས་ཀྱི་བརྩེ་དུང་དེ་རྙེད་བྱུང་ལ

ཡབ་མེས་ཚོས་གནང་བའི་ས་མཐོའི་བུ་མོའི་ལས་དབང་ལ་འཁང་ར་མ་བྱུང་།

ས་མཐོའི་བུ་མོར་ཡར་ཀླུང་གཙང་བོར་འགྲན་པའི་ངང་རྒྱུད་ཡོད་ལ

ས་མཐོའི་བུ་མོར་ཇོ་མོ་གླང་མ་ལྟ་བུའི་སྤོབས་པ་ཡོད།

ས་མཐོའི་བུ་མོར་གངས་ལྗོངས་ཀྱི་ནམ་མཁའ་ལྟ་བུའི་དྭངས་གཙང་གི་སེམས་པ་ཡོད།

ས་མཐོའི་བུ་མོར་ཡངས་པའི་རྩྭ་ཐང་ལྟ་བུའི་སེམས་རྒྱ་ཡོད།

རི་ཟོམ་དང་ན་ཐང་དུ་ངལ་རྩོལ་ལ་བྲེལ་བའི་ས་མཐོའི་བུ་མོ

ནོར་ལུག་དང་ཁང་ཁྱིམ་གྱི་བར་དོ་ན་འདར་བའི་ས་མཐོའི་བུ་མོ

སྐེ་ཁུག་ནས་འགྲིལ་གྱིན་པའི་རྔུལ་ཆུ

འཛུབ་མགོ་རུ་གས་ཁ་ཤོར་བའི་རྨ་ཁ

དཔྲལ་བ་ན་གཉེར་རིས་གསལ་བའི་ལང་ཚོ

དེ་ལྟར་རུང་ས་མཐོའི་བུ་མོའི་གཤིས་ཀ་དང་ནང་སེམས་གྱི་བར་ན

མུ་ཏིག་ལྟ་བུའི་དྭངས་གཙང་གི་རྣམ་ཤེས་ཡོད

མཁའ་དབྱིངས་ལྟ་བུའི་ཞེང་ཆེ་བའི་བློ་རྒྱ་ཡོད 

ས་མཐོའི་བུ་མོའི་བྲང་གཞུང་དུ།

མེས་མོ་ཚོ་བློ་ཡིད་ཚིམས་ཏེ་གཟིམས་མྱོང་ལ

ས་མཐོའི་བུ་མོའི་མངལ་སྒོ་རུ།  

སྐྱེས་ཆེན་དུ་མས་འཇིག་རྟེན་མཇལ་བའི་ལམ་བུ་ཡོད།

ས་མཐོའི་བུ་མོའི་པང་ཁ་རུ།

 བྱིས་པའི་རྣམ་ཤེས་བྱམས་བརྩེ་ལ་འཐིམས་མྱོང་།

ས་མཐོའི་བུ་མོའི་རུམ་པ་རུ། 

སྟག་ཤར་གཞོན་ནུ་ཤ་དྲོད་ཀྱིས་བཟི་མྱོང་

ས་མཐོའི་བུ་མོའི་བློ་ངོགས་སུ། 

ཁྱིམ་གཞི་ཞིག་གི་དྲོད་འཁོལ་འཁྱིལ་ཡོད

རྒྱལ་ཁམས་འགྲིམས་པའི་གོམ་བགྲོས་ལས་ཕྱིར་མིག་འཕངས་དུས

ས་མཐོའི་བུ་མོས་ཁྲེལ་གཞུང་མིག་ལྟར་བརྩི་ལ

ས་མཐོའི་བུ་མོས་ཁྱིམ་གཞི་སྲོག་གིས་སྲུང་ཡོད།

ས་མཐོའི་བུ་མོ་ནི་ངའི་རྣམ་ཤེས་འདེགས་མཁན་གྱི་རྨུ་ཐག་ཡིན།