圣洁甘孜

ནང་དོན་གནད་བསྡུས། གཅིན་སྙི་ཟ་ཁུའི་ནད་ནི་དེང་གི་དུས་སུ་སྤྱི་ཚོགས་འཕེལ་རྒྱས་འགྲོ་མགྱོགས་པ་དང་། མི་རྣམས་ཀྱི་འཚོ་བའི་ཆ་རྐྱེན་ཡར་རྒྱས་འགྲོ་བའི་དུས་དེར་མི་རྣམས་ཀྱི་འཚོ་བའི་གོམས་གཤིས་ལ་ལྷོད་གཡེང་ཤོར་བ་དང་། བདེ་ཐང་བདེ་སྲུང་གི་ཤེས་བྱའམ་འདུ་ཤེས་ཞན་པས་ཟས་སྤྱོད་ལ་ཡིད་གཟབ་མ་བྱས་པའི་རྐྱེན་གྱིས་ཕོ་བའི་མེ་དྲོད་ཉམས་ཞན་དུ་སོང་ནས་ཟས་སྐོམ་རྣམས་མྱག་ཞུ་དྭངས་སྙིགས་ལེགས་པར་འབྱེད་མ་ཐུབ་པ་སྟེ། ཟས་སྐོམ་ལེགས་པར་འཇུ་མ་ཐུབ་པས་རིམ་བཞིན་བད་ཀན་གྱི་ཚིལ་འཕེལ་ནས་གཅིན་སྙི་ཟ་ཁུའི་ནད་དུ་གྱུར་བ་ཡིན།

བརྡ་ཆད་གཙོ་བོ། གཅིན་སྙི། ཟ་ཁུ། སློང་རྐྱེན། བདེ་སྲུང་།

མིག་སྔར་ཀྲུང་གོའི་རྒྱལ་ཁབ་ཀྱི་ནད་འདི་ཕོག་པའི་གྲངས་ཚད་ནི་འཛམ་གླིང་ཐོག་གི་བརྒྱ་ཆའི་གྲངས་ཚད་ཨང་དང་པོར་སླེབས་ཀྱི་ཡོད་པ་དང་། རང་རེའི་ལྗོངས་སུ་ཉེ་བའི་ལོ་ཤས་ནང་གཅིན་སྙི་ཟ་ཁུའི་ནད་འདི་ཕོག་ཚད་ཇེ་མང་དུ་སོང་། ལྷག་པར་དུ་ནད་དེར་བླ་གཉན་གྱི་བསྡོངས་ཟླ་མང་བས་མི་རྣམས་ཀྱི་བདེ་ཐང་དང་ཚེ་སྲོག་ལ་ཉེན་ཆེ་ཞིང་གསོ་དཀའ་བའི་ ནད་རིགས་ཤིག་ཏུ་གྱུར་ཡོད།

དང་པོ། གཅིན་སྙི་ཟ་ཁུའི་ནད་ཀྱི་ངོ་བོ་དང་ངེས་ཚིག

གཅིན་སྙི་ཟ་ཁུའི་ནད་ཀྱི་ངོ་བོ་ནི་བད་ཀན་ས་ཆུའི་རང་བཞིན་གྱིས་མཁལ་མ་དང་ལྒང་པའི་ནུས་པ་ཉམས་ནས་དུས་ངེས་མེད་ལ་ཟུངས་དང་འདྲེས་པའི་གཅིན་པ་ཡང་ཡང་བབས་པའི་གྲང་བའི་ནད་ཅིག་ཡིན། གཅིན་སྙི་ཞེས་པ་ནི་གཅིན་ཁ་སྙི་ཞིང་དུས་མིན་གྱི་གཅིན་པ་ཡང་ཡང་བཏང་དགོས་པའི་དོན ། ཕྱག་རྡོར་མགོན་པོས། གཅིན་སྙིའི་ནད་ཅེས་བྱ་བ་ནི། །མཁལ་མ་ལྒང་པའི་སྟོབས་ཤོར་ནས། །མལ་ས་སྟན་དང་གཉིད་ལོག་དུས། །དབང་མེད་གཅིན་མང་གྲངས་མང་ཤོར། །ཞེས་གསུངས་པ་དང་། ཟ་ཁུ་ཞེས་པ་ནི་གཅིན་པའི་ནང་དུ་ལུས་ཟུངས་འཛག་ཅིང་བབས་པར་གྱུར་ནས་ལུས་ཟུངས་ཟད་པར་བྱས་པས་ན་ཟ་ཁུ་ཞེས་བཤད་པ་ཡིན། དེ་ཡང་རྗེ་ཟུར་མཁར་བས། གཅིན་སྙི་ཡིན་མིན་གཅིན་པའི་གྲངས་ལ་བརྟག །ཟ་ཁུ་ཡིན་མིན་གཅིན་པའི་མདོག་ལ་བརྟག །ཅེས་གསུངས་པ་ལྟར་གཅིན་སྙི་དང་གཅིན་སྙི་ཟ་ཁུའི་དབར་གྱི་ཁྱད་པར་གསུངས། གཞན་ཡང་དཔལ་སྤུངས་པའི་རྒྱུད་བཞིའི་དཀའ་འགྲེལ་ལས། ཟ་ཁུ་ནི་རླན་ཅན་གྱི་མལ་དུ་རྒྱུན་རིང་གནས་པ་སོགས་ཀྱིས་མཁལ་མའི་ནུས་པ་ཉམས་ནས་ཆུ་ཁམས་ཀྱི་སྙིགས་མ་དང་ལུས་ཟུངས་གཉིས་ཕྱེ་མ་ནུས་པ་ཟུངས་དང་འདྲེས་པའི་དྲི་ཆུ་ལྒང་པའི་གནས་སུ་དུས་མིན་དུ་ཟགས་ནས་ཕྱིར་བབས་པའི་གཅིན་མདོག་རྙོག་ཅན་གྱི་མིང་འཛིན་པ་དེ་ཡིན།

གཉིས་པ། གཅིན་སྙི་ཟ་ཁུའི་ནད་ཀྱི་སློང་རྐྱེན།

རྒྱུད་ལས། རྒྱུ་རྐྱེན་ལན་ཚ་མངར་བསིལ་ལྕི་བའི་ཟས། །རླན་ཅན་མལ་འདུག་བད་ཀན་ཚིལ་འཕེལ་བ། །ལྒང་པར་ཟགས་པས་ཟ་ཁུ་སྐྱེད་པར་བྱེད། །ཅེས་གསུངས་པ་ལྟར་གཅིན་སྙི་ཟ་ཁུའི་ནད་ཀྱི་རྒྱུ་རྐྱེན་གཙོ་བོ་ཟས་སྐོམ་རོ་ལན་ཚ་བ་དང་མངར་བ། ནུས་པ་ལྕི་བ་དང་བསིལ་བའི་རིགས། ཤ་མར་སོགས་བཅུད་ཆེན་རིགས་བསྟེན་དྲགས་པ། ཆང་རག་འཐུང་དྲགས་པ། སྤྱོད་ལམ་ཐད་ཡུལ་གཞའ་ཚན་དང་བརླན་གཤེར་ཆེ་བའི་ཡུལ་ལ་བསྡད་པའམ་ཉལ་དྲགས་པ། རྟག་ཏུ་དྲི་མ་ཅན་གྱི་མལ་གདན་བསྟེན་པ། ལུས་པོ་དལ་དྲགས་པ་དང་ཉལ་དྲགས་པ་སོགས་ཀྱིས་ནད་འདི་སློང་བ་ཡིན། གཞན་ཡང་ཚོ་ཆེ་བ་ལས་ནད་འདི་འབྱུང་བ་ཡིན་ཏེ། རྒྱུད་ལས། ཐལ་དྲགས་ཚོ་ཆེས་འབྲས་དང་རྨེན་བུ་དང་། །རྨོངས་བག་གཅིན་སྙི་ལུད་པ་བད་ཀན་འཕེལ། །ཞེས་གསུངས་པ་ལྟར་མདོར་ན་ལུས་པོ་བདེ་བ་ལ་ཆགས་དྲགས་པ་དང་ཟས་སྐོམ་ཞིམ་ཟས་བསྟེན་དྲགས་པ། ལུས་པོའི་འགུལ་བསྐྱོད་དམ་སྦྱོང་བརྡར་ཞན་པས་བད་ཀན་གྱི་ཚོ་ཆེ་བ་དང་ལུས་པོའི་ཚིལ་གྱི་ཆ་རྣམས་འཕེལ་ནས་ཟས་སྐོམ་གྱི་དྭངས་མ་ཟུངས་སུ་མ་སྨིན་པས་སྙིགས་མ་དང་འདྲེས་ནས་གཅིན་སྙི་ཟ་ཁུའི་ནད་འབྱུང་། ལྕི་སྣུམ་གྱི་ཟས་སྤྱོད་བསྟེན་དྲགས་པ་ལས་མཁལ་མའི་ནུས་པ་ཉམས་ཞན་དུ་ཕྱིན་ནས་གཅིན་གྱི་ནང་དུ་ལུས་ཟུངས་ཤོར་བས་ནད་འདི་འབྱུང་བ་ཡིན།

གསུམ་པ། གཅིན་སྙི་ཟ་ཁུའི་ནད་དུ་གྱུར་ཚུལ།

གཅིན་སྙི་ཟ་ཁུའི་ནད་ཀྱི་གྱུར་ཚུལ་ནི་གོང་གསལ་གྱི་སློང་རྐྱེན་དེ་དག་གིས་ཕོ་བའི་མེ་དྲོད་ཉམས་ཞན་དུ་སོང་ནས་མེ་མཉམ་རླུང་གིས་དྭངས་སྙིགས་འབྱེད་མ་ཐུབ་པར། སྙིགས་མ་དྭངས་མའི་རྩ་མིག་སྟེ་མཆིན་ལམ་དུ་ཤོར་བ་ཡིས་མདངས་སྒྱུར་མཁྲིས་པས་ཟུངས་ཁྲག་ཏུ་སྨིན་མ་ཐུབ་བར་ཡུན་རིང་མཆིན་པར་གནས་པས་དངས་མ་མ་ཞུ་བར་གྱུར། པོད་དམར་ལས། དངས་མ་མ་ཞུ་ཞེས་བྱ་བ། །མེ་མཉམ་རླུང་གི་སྟོབས་ཉམས་ནས། །དངས་སྙིགས་འདྲེས་པས་མཆིན་ལམ་ཤོར། །ཟུངས་སུ་མ་འགྱུར་ནད་དུ་འགྱུར། །ཞེས་གསུངས་འདུག དེས་ན་ཟུངས་ཁྲག་སྨིན་མ་ཐུབ་པའམ་དྭངས་མ་མ་ཞུ་བའི་སྐྱོན་ཅན་གྱི་དྭངས་མ་དེ་མཁལ་མས་དྭངས་སྙིགས་ལེགས་པར་ཕྱེ་མ་ཐུབ་པས་ལྒང་པའི་གནས་སུ་ལྷུང་བ་ཡིན། དེ་ཕྱིར་ལུས་ཀྱི་དྭངས་མའི་བཅུད་མི་འདང་བས་ལུས་ཤ་སྐེམ་པོར་འགྲོ་བ་དང་། རྒྱུན་ལྡན་ནད་ཐོག་དངོས་ཀྱི་ནང་ནད་པ་དེའི་རིགས་ཀྱི་ཁྲག་དང་གཅིན་པའི་ནང་མངར་ཆའི་ཚད་གཞི་འཕེལ་བའང་ལུས་ཟུངས་ཀྱི་དྭངས་མ་དེ་དྲི་ཆུ་དང་ལྷན་དུ་བབས་པ་ལ་བརྟེན་ནས་བྱུང་བ་ཡིན། དེ་ཡང་གཅིན་ལམ་ཁོ་ན་ལས་བྱུང་བ་ཅི་ཡིན་སྙམ་ན། དྭངས་མ་མ་ཞུ་བ་དེ་མཆིན་པར་གནས་པ་དང་། མཆིན་པའི་གནས་ཀྱི་སྙིགས་མ་མཁལ་མར་འགྲོ་བ་ཡིན་ཏེ། སྨན་དཔྱད་ཟླ་རྒྱལ་ལས། མཆིན་པའི་སྙིགས་མ་མཁལ་མར་འགྲོ། །ཞེས་གསུངས་ཡོད། དེ་ལྟར་མཆིན་པ་ནས་མཁལ་མར་འགྲོ་བ་དང་། མཁལ་མ་ནས་ལྒང་པ་བརྒྱུད་དེ་གཅིན་ལམ་ནས་ཕྱིར་འདོར་བ་ཡིན། དེང་དུས་གསོ་རིག་གི་གཅིན་པ་མངར་གྱུར་ནད་བརྗོད་པའི་མངར་བ་དེ་རྒྱུ་ས་ཆུའི་རང་བཞིན་དེ་ལ་བརྟེན་ནས་འབྱུང་བ་ཡིན་པར་སྙམ།

བཞི་པ། གཅིན་སྙི་ཟ་ཁུའི་ནད་ཀྱི་དབྱེ་བ།

གཅིན་སྙི་ཟ་ཁུའི་ནད་འདི་ལ་ཡང་ཉེས་པའམ་བཅོས་དཀའ་སླའི་དབྱེ་བ་མང་དུ་ཡོད་དེ། བད་ཀན་ལས་གྱུར་བའི་གཅིན་སྙིའི་ནད་བཅུ་དང་། མཁྲིས་པ་ལས་གྱུར་བའི་གཅིན་སྙིའི་ནད་དྲུག དེ་བཞིན་རླུང་ལས་གྱུར་བའི་གཅིན་སྙིའི་ནད་བཞི་བཅས་བསྡོམས་པས་དབྱེ་བ་ཉི་ཤུ་ཙམ་ཡོད། རྒྱུད་ལས། བད་ཀན་ཟ་ཁུ་ཆུ་ཆང་བུར་ཤིང་དང་། །གར་པོ་འབྲས་ཕྱེ་ཁུ་ཆུ་བྱེ་མ་དང་། བསིལ་དང་བག་འབྱུང་ཁ་ཆུ་བཅུ་རུ་བཤད། །ཅེས་གསུངས་པ་ལྟར་བད་ཀན་གྱི་ཟ་ཁུ་མདོག་བད་ཀན་དང་འདྲ་ལ་སྟེང་འོག་དྲི་མ་མེད་པ་ཆུ་དང་འདྲ་བ་གཅིག བསྐ་བས་ཆང་དང་འདྲ་བ་དང་གཉིས། རྙོགས་མ་ཅན་དང་གཅིན་བག་སྨུག་པོ་བུར་ཤིང་གི་ཁུ་བ་འདྲ་བས་གསུམ། ཞག་ལོན་ནས་གར་པོར་གྱུར་ཞིང་སྤུ་རྩེ་འདྲ་བས་བཞི། དཀར་བ་འབྲས་ཕྱེ་འདྲ་བས་ལྔ། ཁ་ཆུ་འདྲ་བ་དང་དྲུག དྲི་མ་ཅན་ཕྱེ་རྩིག་འདྲ་བ་བྱེ་མ་ཅན་དང་བདུན། གཅིན་མང་རེག་བྱ་གྲང་ལ་རོ་མངར་བ་བསིལ་གྱི་ཟ་ཁུ་དང་བརྒྱད། ཉུང་ཟད་དལ་བུས་འབྱུང་གི་ཟ་ཁུ་དང་དགུ། ནལ་ནལ་གྱི་སྤྱིན་བག་ཅན་ཁ་ཆུ་འདྲ་བ་སྟེ་བད་ཀན་ལས་གྱུར་བ་བཅུ་བཅས་ཡོད།། མཁྲིས་པ་ལས་གྱུར་བའི་ཟ་ཁུ་ནི་རྒྱུད་ལས། མཁྲིས་པའི་ཟ་ཁུ་ནས་ཚིག་སྣག་ཚ་དང་། །སྔོན་པོ་སྐྱེར་ཁུ་བཙོད་ཁུ་ཁྲག་འདྲ་དྲུག །ཅེས་གསུངས་པ་ལྟར་ཟ་ཁུ་དྲི་རོ་ཁ་དོག་ནས་ཚིག་གི་ཁུ་བ་འདྲ་བ་གཅིག་དང་། ཟ་ཁུའི་ཁ་དོག་སྣག་ཚ་འདྲ་བས་གཉིས། ཁ་དོག་སྔོ་བ་སྔོན་པོ་དང་འདྲ་བ་གསུམ། ཚ་ཞིང་ཁ་དོག་སེར་པོ་སྐྱེར་ཁུ་དང་འདྲ་བས་བཞི། དྲི་མ་མནམ་ཞིང་མདོག་དམར་བ་བཙོད་ཁུ་འདྲ་བ་དང་ལྔ། དྲི་ང་ཞིང་ལན་ཚར་བཅས་པས་མདོག་ཁྲག་འདྲ་བའི་ཟ་ཁུ་སྟེ་མཁྲིས་པ་ལས་གྱུར་བ་དྲུག་བཅས་ཡོད། རླུང་གི་ཟ་ཁུ་ལ་རྒྱུད་ལས། རླུང་གྱུར་རྐང་ཞག་གླང་ཆེན་སྦྲང་འདྲ་བཞི། །ཞེས་གསུངས་པ་ལྟར་ཟ་ཁུ་རྐང་མར་འདྲེས་པ་རྐང་གི་ཟ་ཁུ་དང་གཅིག ཞག་མདངས་འདྲེས་པ་ཞག་གི་ཟ་ཁུ་དང་གཉིས། ཆུ་སེར་རྙོག་བཅོས་གླང་ཆེན་གྱི་དྲི་ཆུ་ལྟར་རྒྱུན་དུ་ནར་མར་འབྱུང་བ་གླང་ཆེན་ཟ་ཁུ་དང་གསུམ། མདོག་སེར་སྨུག་སྦྲང་རྩི་འདྲ་བ་བཞི་སྟེ་རླུང་ལས་གྱུར་བ་བཞི། དེ་ལྟར་རླུང་མཁྲིས་བད་ཀན་གྱི་ཟ་ཁུ་ཡོངས་སུ་དྲིལ་བས་ནད་རིགས་དབྱེ་བ་ཉི་ཤུ་འབྱུང་བ་ཡིན། གཞན་ཡང་དཀོན་རྒྱལ་ཉམས་ཡིག་ལས། ཟ་ཁུ་རྒོད་གཡུང་རྣམ་པ་གཉིས། །རྒོད་ནི་ཁྲག་ཏུ་འཛག་པ་ཡིན། །ཟུག་གཟེར་སྲོག་ལ་སྤུ་གྲིས་གཅོད། །གཡུང་ནི་གཅིན་དང་ས་བོན་འོང་། །རླུས་གིས་རྩ་ཁ་བདས་པ་ཡིན ། །ཞེས་གསུངས།

ལྔ་པ། གཅིན་སྙི་ཟ་ཁུའི་ནད་ཀྱི་མངོན་ཚུལ་ལམ་རྟགས།

༡ གཅིན་སྙི་ཟ་ཁུའི་ནད་སྤྱིའི་རྟགས།

གཅིན་སྙི་ཟ་ཁུའི་ནད་ཀྱི་མངོན་ཚུལ་ནི། མལ་ས་སྟན་དང་གཉིད་ལ་དགའ་བ་དང་། རྔུལ་མང་དུ་འབྱུང་བ། ལུས་ལ་གཅིན་གྱི་དྲི་མནམ་ཞིང་ཁ་མངར་ལ་གྲེ་བ་དང་རྐན་སོགས་སྐམ་པ། ཟ་འདོད་ཆེ་ལ་སྐོམ་དད་ཆེ་བ། ཁ་ཟས་བསིལ་བ་འདོད་པ། ལུས་ཀྱི་ཤ་རིད་པ་དང་ཤ་མདངས་སེར་ཞིང་རྐང་ལག་མཐིལ་བཞི་ཚ་དྲོད་ཆེ་བ། གཅིན་པའི་མདོག་རྙོག་མ་ཅན་འབྱུང་ལ་གཅིན་པ་བཏང་བའི་ཤུལ་ལ་སྦྲང་མའི་ཚོགས་འཁོར་བ། དེ་བཞིན་སེན་མོ་རིང་བ་སྟེ་སེན་མོ་སྐྱེ་མགྱོགས་པ། སྒྱིད་ལུག་པ་བཅས་ནི་ནད་ཀྱི་སྟོབས་ཆེ་ཆུང་མི་འདྲ་བ་ལ་བརྟེན་ནས་ནད་རྟགས་མངོན་ཚུལ་མི་འདྲ་བ་དེ་དག་ཐོན་པ་ནི་གཅིན་སྙི་ཟ་ཁུའི་ནད་ཀྱི་སྤྱིའི་རྟགས་ཡིན་ཏེ་ནད་གཞན་ལའང་གནས་སྐབས་ཆུ་མདོག་དེ་འདྲ་བ་འབྱུང་ཡང་མངོན་ཚུལ་དེ་རྣམས་མེད་ན་ངེས་པ་མ་ཡིན། ཡན་ལག་བརྒྱད་པ་ལས། ཟ་ཁུའི་མངོན་ཚུལ་མེད་པ་ཡི། །གཅིན་བྱུང་བ་དེ་ཟ་ཁུ་མིན། །ཞེས་གསུངས་པ་ལྟར་མངོན་ཚུལ་རྟགས་དང་དྲི་ཆུའི་མདོག་གཉིས་ཟུང་འབྲེལ་བྱས་ནས་ལེགས་པར་བརྟག་དགོས་པ་ཡིན།

༢ གཅིན་སྙི་ཟ་ཁུའི་ནད་ཀྱི་བྱེ་བྲག་གི་རྟགས།

གཅིན་སྙི་ཟ་ཁུའི་ནད་ཀྱི་བྱེ་བྲག་གི་རྟགས་བརྗོད་པ་ནི། རྒྱུད་ཀྱི་ཚ་བ་གསོ་བ་ལས། སྤྱི་རྟགས་དེ་དག་ཀུན་ལ་ཁྱབ་སྟེང་སུ། །ཞེས་པ་ལྟར་གོང་གི་སྤྱིའི་རྟགས་དེ་དག་བྱུང་བའི་ཁར། བད་ཀན་ལས་གྱུར་བའི་རྟགས་སུ་ཁ་ཟས་མི་འཇུ་ཞིང་། དང་ག་འགག་པ། གཉིད་ཆེ་བ། ལུད་པ་མང་ཞིང་སྐྱུག་པར་བྱེད་པ་སོགས་ཀྱི་མངོན་རྟགས་ལྡན། མཁྲིས་པ་ལས་གྱུར་བའི་རྟགས་སུ་མཚན་མ་དང་ལྒང་པར་ན་ཟུག་གཏོང་བ། ཁ་སྐམ་ཞིང་ལུས་དྲོད་ཆེ་བ། ཁོག་པ་འཁྲུ་ཞིང་རིམས་ཀྱིས་འདེབས་པ་ལྟར་ལུས་ཀྱི་ཚིགས་ཀུན་ན་བ་སོགས་ཀྱི་མངོན་རྟགས་འབྱུང་། རླུང་ལས་གྱུར་བའི་རྟགས་སུ་སྙིང་འཕར་ཤུགས་ཆེ་བ་དང་འཕར་མགྱོགས་པ། གཉིད་ཆུང་བ། དབུགས་མི་བདེ་ཞིང་ལུས་འདར་ལ་གཟེར་བ། ཟས་ལ་རྔམ་ཞིང་ལུད་པ་མང་དུ་འབྱུང་བ་བཅས་མཆིས།

དྲུག་པ། གཅིན་སྙི་ཟ་ཁུའི་བླ་གཉན་གྱི་ནད།

གཅིན་སྙི་ཟ་ཁུའི་ནད་དེ་དུས་ཐོག་ཏུ་མ་བཅོས་ན་སྲོག་ལ་རྒོལ་བར་བྱེད་པའི་བླ་གཉན་ནད་དང་བསྡོངས་ཟླ་མང་བ་སྟེ། འབྲས་ནད་དང་། ཐོར་པ། མེ་དབལ་སོགས་པགས་ནད་སྣ་ཚོགས་ཐོན་པ། རྐང་པའི་རྨ་གཉན་ནད་འབྱུང་བ་དང་རྨ་གཉན་གསོ་དཀའ་བ། དེ་བཞིན་མིག་གི་མཐོང་བྱེད་ཀྱི་ནུས་པ་ཞན་དུ་སོང་བ། སོ་རྙིལ་ནས་ཁྲག་ཐོན་པ། སྐྲ་བྱི་བ། སོ་རྩ་མི་བརྟན་པར་གྱུར་ནས་ན་ཚོད་ལ་མ་སླེབས་ཀྱང་དུས་མིན་གྱི་སོ་བུད་པ། ནད་གཞི་ལྕི་བའི་དུས་སུ་མཁལ་མ་དང་ལྒང་པ་སོགས་ཀྱི་ནུས་པ་ཆེར་ཉམས་སྟེ་དྲན་མེད་དུ་བརྒྱལ་བ་སོགས་ཀྱི་བླ་གཉན་ནད་ཐོན་བཞིན་འདུག

བདུན་པ། གཅིན་སྙི་ཟ་ཁུའི་ནད་ཀྱི་བདེ་སྲུང་།

ནད་ཀྱི་སློང་རྐྱེན་དུས་གདོན་ཟས་སྤྱོད་བཞི་ལས་ཟས་སྐོམ་དང་སྤྱོད་ལམ་གཉིས་ཡིད་གཟབ་བྱ་རྒྱུ་ནི་ཤིན་ཏུ་ནས་གལ་ཆེ་སྟེ། རྒྱུད་ལས། ནད་སློང་རྐྱེན་གཉིས་དྲན་པས་རྟག་ཏུ་སྤངས། །ཞེས་དང་། ཟས་སྐོམ་ལེགས་སྤྱད་ལུས་དང་སྲོག་འཚོ་ཞིང་། །དམན་ལྷག་ལོག་གྱུར་ནད་སྐྱེད་འཕྲལ་སྲོག་འཇོམས། །དེ་ཕྱིར་ཟས་སྐོམ་སྦྱོར་བ་མཁས་པ་གཅེས། །ཞེས་གསུངས་པ་ལྟར་ཟས་སྐོམ་གྱི་སྦྱོར་བ་རྣམས་ལེགས་པར་བསྟེན་ན་ལུས་དང་སྲོག་འཚོ་ཞིང་ཚེ་རིང་བར་གནས་པ་སོགས་ཀྱི་དགོས་པ་ཡོན་ཏན་ཡོད་པ་ཡིན། དེ་ལྟར་མ་ཡིན་པར་ཟས་སྐོམ་གྱི་སྦྱོར་བ་དང་མི་ལྡན་པར་དམན་པ་དང་ལྷག་པ། ལོག་པ་གསུམ་གང་ཡང་རུང་བར་གྱུར་ན་གཅིན་སྙི་ཟ་ཁུ་སོགས་ནད་མང་དག་སྐྱེད་ཅིང་། ལུས་དང་སྲོག་ཀྱང་འཕྲལ་དུ་འཇོམས་པའི་ཉེས་སྐྱོན་ཡོད། དེ་ཕྱིར་ཟས་སྐོམ་སོགས་ཀྱི་ཐོག་ནས་བདེ་སྲུང་གི་ཐབས་ལམ་བཤད་པར་བྱ།

༡ ཟས་སྐོམ་གྱི་སྒོ་ནས་བསྲུང་བ།

གཅིན་སྙི་ཟ་ཁུའི་ནད་དེ་ཉིད་ཕྱུག་པོའི་ནད་ཡིན་ཞེས་སྔོན་གྱི་དྲང་སྲོང་རྣམས་ཀྱིས་གསུངས་པས། ངེས་པར་དུ་ཟས་སྐོམ་ལ་ཡིད་གཟབ་བྱེད་དགོས་པ་འདི་ལྟར་ཏེ། འབྲུ་རྙིང་གི་རྩམ་པ་དང་སྐམ་སར་གནས་པའི་ཚག་ཤ བརླན་གནས་ཀྱི་ཉ་ཤ་དང་ལ་ཕུག་གསར་པ་སོགས་གཡོས་སུ་བྱས་པ་དང་བཙོས་པ། ནུས་པ་ཡང་ཞིང་དྲོ་བ་དང་ཅུང་རྩུབ་པའི་ཟས་སྐོམ་དག་བསྟེན་རྒྱུ་ལས། རོ་མངར་བ་ཀ་ར་དང་བུ་རམ། རོ་ལན་ཚ་བའི་རིགས། ནུས་པ་བསིལ་བ་ར་ཤ་དང་ཕག་ཤ་ལྟ་བུ། ནུས་པ་ལྕི་བ་གྲོ་ཞིབ་ལྟ་བུ་དང་། ཟས་གང་ཡང་རྗེན་པའི་རིགས་དང་། ཆང་རག་སོགས་མཆིན་པ་དང་མཁལ་མར་གནོད་པའི་རིགས་སྤང་བྱར་བཟུང་དགོས། དེ་བཞིན་ཟས་སྐོམ་གྱི་བསྟེན་ཚད་ལེགས་པར་ཤེས་དགོས་ཏེ། རྒྱུད་ལས། དུས་ཀུན་ཏུ་ནི་ཟ་ཚོད་རན་པར་བཟའ། །ཟས་རྣམས་ལྕི་ཡང་ཚད་ལས་དཔག་བྱ་སྟེ། །ཡང་ལ་འགྲངས་ཤིང་ལྕི་ལ་ཕྱེད་འགྲངས་ཙམ། །བདེ་བླག་འཇུ་སླ་ཚོད་ཟིན་ཞེས་སུ་བཤད། །དེ་ནི་ལུས་འཚོ་མེ་དྲོད་སྐྱེད་བྱེད་ཡིན། །ཞེས་དང་། དེ་ཕྱིར་ཟས་དང་ཕོ་བའི་མེ་དྲོད་སྦྱར། །ལྟོ་བའི་ཆ་གཉིས་ཟས་ལ་ཆ་གཅིག་སྐོམ། །ཆ་བཞི་པ་ནི་རླུང་གི་གནས་སུ་བཞག །ཅེས་གསུངས་པ་ལྟར་ཟས་ཀྱི་ཚུལ་དང་ཟས་ཀྱི་ཚད་ལེགས་པར་སྤྱད་ན་མེ་དྲོད་བསྐྱེད་ནས་ཟས་སྐོམ་དྭངས་མ་རྣམས་ཉེས་པའི་ལམ་མ་ཡིན་པའི་གནས་སུ་མི་འགྲོ་སྟེ། དྭངས་སྙིགས་ལེགས་པར་ཕྱེ་བ་དང་། དྭངས་མ་རང་རང་གི་གནས་ལུས་ཟུངས་བདུན་ལ་ལེགས་པར་འཇུག་ནས་ལུས་ཀྱི་སྟོབས་རྒྱས་པ་དང་ནད་འགོག་གི་ནུས་པ་འཕེལ་བ། ལུས་པོ་ཡང་ཤ་དོད་པ་དང་ཟས་སྐོམ་ལ་དང་ག་བདེ་བ། ལྷག་པར་དུ་མིག་ལ་སོགས་པའི་དབང་པོ་གསལ་བ་དང་། དབང་པོའི་སྟོབས་དང་ལྡན་པར་གྱུར་ནས་ཡུན་རིང་ནད་མེད་དུ་གནས་པ་ཡིན།

༢ སྤྱོད་ལམ་གྱི་སྒོ་ནས་བསྲུང་བ།

གཅིན་སྙི་ཟ་ཁུའི་ནད་སྤྱོད་ལམ་གྱི་ཐོག་ནས་བསྲུང་བ་ནི་རྒྱུད་ལས། དུས་དང་དབང་པོ་སྤྱོད་ལམ་རོ་ནུས་རྣམས། །དམན་དང་ལོག་པ་ལྷག་པས་ནད་སྐྱེད་ལ། །ཡང་དག་སྦྱོར་བས་ནད་མེད་གནས་པའི་རྒྱུ། །ཞེས་གསུངས་པ་ལྟར་དབྱར་དགུན་ལ་སོགས་པའི་དུས་དང་། མིག་ལ་སོགས་པའི་དབང་པོ། སྒོ་གསུམ་སྟེ་ལུས་ངག་ཡིད་གསུམ་གྱི་སྤྱོད་ལམ། ཟས་སྨན་སོགས་ཀྱི་རོ་ནུས་བཅས་པ་རྣམས་རང་རང་གི་མཚན་ཉིད་ཀྱི་ཚད་དམན་པར་མི་བྱ་བ་ཡིན། གཅིན་སྙི་ཟ་ཁུའི་ནད་འདི་ལུས་པོའི་རྩོལ་བཅག་དམན་པ་ལས་བྱུང་བ་ཡིན། དམན་པ་དང་ལོག་པ་ལྷག་པ་རྣམས་ཀྱིས་ནད་བསྐྱེད་པ་ཡིན་ལ། ཡང་དག་སྦྱོར་བ་ནད་མེད་པར་གནས་པའི་རྒྱུ་ཡིན་པའི་ཕྱིར། དེ་ལྟར་ལུས་དལ་བར་མི་བསྡད་པར་ལུས་སྦྱོང་རན་པོ་ཉིན་ལྟར་བྱེད་དགོས་པ་ནི་ཤིན་ཏུ་ནས་གལ་ཆེ། རན་པོ་ནི་སོ་སོའི་ན་ཚོད་དང་ལུས་སྟོབས་ལ་བསྟུན་ནས་མི་རྔུལ་ཙམ་བཅག་དགོས་པ་ཡིན། དཔལ་ལྡན་རྒྱུད་བཞི་ལས། ལུས་ཡང་ཚིལ་འབྲི་སྐབས་ཕྱེད་མེ་དྲོད་སྐྱེད། །མཁྲེགས་དང་ལས་ནུས་ཡང་དག་རྩོལ་སྤྱད་འབྱུང་། །ཐལ་དྲག་ལོག་པས་དེ་ལས་མ་རུངས་འགྱུར། །རྒན་བྱིས་རླུང་མཁྲིས་ནད་ཅན་དེ་སྤངས་བྱ། །ཞེས་གསུངས། དུས་དང་དབང་པོ་སྤྱོད་ལམ་ཚད་ལས་ཐལ་བ་སྟེ་ལྷག་པ། དེ་དག་ལས་ལྡོག་པ་སྟེ་ལོག་པ་བཅས་གསུམ་གྱི་རྐྱེན་དང་བྲལ་ཏེ་ཇི་ལྟར་འཚམས་ཞིང་ཡང་དག་པར་བསྟེན་ན་གཅིན་སྙི་ཟ་ཁུའི་ནད་མི་ཡོང་བའི་སྔོན་འགོག་དང་བདེ་སྲུང་ཐུབ་པའི་ཐབས་ལམ་ཡང་དག་ཅིག་ཡིན། གཞན་ཡང་སྐྱེ་བོ་གང་ཞིག་མཚན་དུས་གཉིད་ཆག་པ་དང་། ཆང་རག་གིས་ར་བཟི་བ། ལུས་ཀྱི་སྟོབས་ཟད་པ། སེམས་ལ་མྱ་ངན་ལྡན་པ། ན་ཚོད་རྒས་པ། ལུས་རྩོལ་བས་དུབ་པ་སོགས་ལ་ཉིན་པར་གཉིད་ལོག་ན་ངལ་གསོ་བདེ་ཞིང་རླུང་སེལ་བ་སོགས་ཕན་པ་ལྡན་མོད། དེ་མིན་ཉིན་པར་གཉིད་ལོག་ན་བད་ཀན་འཕེལ་བ་དང་ཤེས་པ་རྨོངས་པ། སྒྱིད་པ་སྒྱུར་བ་སོགས་ཡོང་བ་དང་། ལྷག་པར་དུ་གཅིན་སྙི་ཟ་ཁུའི་ནད་པས་དུས་མ་ཡིན་པར་ཉིན་པར་གཉིད་ལོག་རྒྱུ་མེད་པ་དང་། དེ་བས་ཟས་སྐོམ་ངོམས་པའི་རྗེས་དེ་མ་ཐག་ཏུ་གཉིད་ཉལ་བར་བྱ་རྒྱུ་ནི་སྤངས་དགོས། སློབ་དཔོན་དཔའ་བོས། མཚན་མོ་གཉིད་ནི་མ་ལོག་རྩུབ། །ཉིན་གཉིད་ཐམས་ཅད་ལྕི་བ་ཡིན། །ཞེས་གསུངས་འདུག

༣ དྲིལ་ཕྱིས་ཀྱི་སྒོ་ནས་བསྲུང་བ།

དེ་ལྟར་ལུས་སྦྱོང་སོགས་རྩོལ་བཅག་བྱས་པ་དང་། ལུས་པོ་ཆུ་ཡིས་བཀྲུ་བ་སོགས་བྱས་པའི་རྗེས། ལུས་ལ་སྣུམ་བྱུག་དང་རྩ་བྱུག་སོགས་ཀྱིས་བྱུགས་པ་བྱས་ནས། རྩམ་ཕྱེ་སོགས་ཀྱིས་ལུས་པོ་ཕྱིས་པ་དང་སྦྲགས་ཕྱེ་ཕུར་བྱས་པས་བད་ཀན་སེལ་ཞིང་ལུས་ཀྱི་ཚིལ་འཇུ་བར་བྱེད་དགོས།

༤ སེམས་ཁམས་ཀྱི་སྒོ་ནས་བསྲུང་བ།

སེམས་ཁམས་བློ་བདེ་བགས་ཕེབས་སུ་གནས་ཐབས་བྱེད་དགོས་པ་ནི་ཤིན་ཏུ་ནས་གལ་ཆེ་སྟེ། ལུས་སེམས་གཉིས་ནི་གཅིག་ལ་གཅིག་རྟེན་གྱི་འབྲེལ་བ་ཡིན་པའི་ཕྱིར། སེམས་ཁམས་བདེ་བར་གནས་ཐུབ་ན་ནད་ཀྱི་སྟོབས་འཇོམས་ཐུབ་པ་དང་། ནད་གཞི་དྲག་སྐྱེད་ཀྱི་གྲོགས་སུ་འགྱུར་བ་ཡོད། གསོ་བྱ་གཅིན་སྙི་ཟ་ཁུའི་ནད་པ་ཞིག་གི་ངོས་ནས་བརྗོད་ན། ཐོག་མར་ནད་དེ་ལས་རྣམ་པར་རྒྱལ་ཐུབ་པའི་སེམས་ཤུགས་ཤིག་དགོས་པ་དང་། རང་ཉིད་ཀྱི་རྒྱུན་ལྡན་འཚོ་བར་བག་ཡོད་དང་སྤྲོ་སྣང་འཕེལ་ཐུབ་པ་ཞིག་བྱ་རྒྱུ་ནི་སེམས་ཁམས་ཀྱི་བདེ་སྲུང་ཡིན་པས་གོང་གསལ་གྱི་བདེ་སྲུང་ཐབས་ལམ་རྣམས་དུས་རྒྱུན་དུ་ནས་བློ་ལ་དྲན་ཞིང་རྒྱུན་བསྲིངས་ནས་བསྟེན་ན་གཅིན་སྙི་ཟ་ཁུའི་ནད་འདི་མི་འབྱུང་བར་སྔོན་འགོག་ཐུབ་ངེས་སོ།།

དྲ་གྲོགས་དཔྱད་བརྗོད།

དྲ་གྲོགས་ཀྱིས་དཔྱད་བརྗོད་དེ་རང་གི་ལྟ་བ་ཡིན་པ་ལས་ངེད་ལས་ཁུངས་ཀྱི་ལྟ་ཚུལ་མིན།

དཔྱད་བརྗོད།(0)

ཉར་ཚགས།

ནང་དོན་གསར་པ།

མཉམ་རོལ་བྱེད་ཡུལ།